أوراقي سليمة؟

إيه الأوراق اللي بتترجم تشيكي وإيه اللي بتترجم إنجليزي؟

بالتشيكي: إثبات المصادر المالية الكافية (كشف الحساب)، مستخرج من سجل السوابق من بلدك وأي بلد أقمت فيه بصورة مستمرة أكثر من 6 أشهر خلال آخر 3 سنين، إثبات استيفاء الشروط الصحية (شهادة طبية)، وشهاداتك الدراسية لآخر 4 سنين. بالإنجليزي: مستند عدد الساعات الدراسية، شهادة أهلية للبكالوريوس، وأي مراسلات مع الجامعة. لو هتدرس بالتشيكي، ترجم كل حاجة تشيكي بدل الإنجليزي.

إيه شروط جواز السفر قبل السفر؟

لازم جوازك يكون ساري. لو عمرك أقل من 15 سنة، لازم تكون مسجل في جواز حد من أهلك أو يكون عندك جواز خاص بيك. عشان تاخد فيزا طويلة، لازم الجواز يكون طالع من أقل من 10 سنين، وفيه صفحتين فاضيين على الأقل، ويكون ساري 3 شهور بعد ما الفيزا تخلص.

إيه هي "المعادلة" (nostrification) وإيه الأوراق المطلوبة ليها؟

المعادلة (nostrification) بتأكد إن مؤهلك الدراسي معادل لمؤهل الطلاب التشيك. هتحتاج شهادتك الدراسية موثقة، خطة دراسية بعدد الساعات لكل مادة على مدار آخر 4 سنين، تقارير الدرجات السنوية الأصلية (مختومة وموقعة)، ونسخة موثقة من ترخيص المدرسة. بتاخد حوالي 30 يوم للمعالجة.

أحتاج أحط قد إيه في الحساب البنكي، ولمدة قد إيه؟

الحد الأدنى المعلن على موقع السفارة الرسمي حوالي 115,810 كرونة تشيكية. لازم يكون المبلغ في حساب جاري، مش شهادات أو ودايع، لمدة 6 أشهر على الأقل قبل المقابلة، ويغطي السكن والأكل والتأمين والسفر ومصاريف الحياة التانية. لو عمرك أقل من 21 ومش هتقدر تفتح حساب بأسمك، تقدر تحطهم في حساب والدك أو والدتك مع صحة توقيع من البنك أو إقرار من الشهر العقاري (بتدفع عادة حوالي 0.5% من قيمة المبلغ كرسوم). دايمًا تابع الصفحة الرسمية للسفارة عشان الرقم بيتغير مع سعر الصرف.

لسه مقيد في جامعة مصرية ومسجلتش بعثة، أطلع تصريح سفر سياحة إزاي؟

هتحتاج شهادة اثبات قيد حديثة من الكلية للعام الدراسي الحالي (معداش عليها 3 شهور)، وبطاقة شخصية سارية وصورة منها. روح منطقة التجنيد اللي انت تابع عليها في محافظتك. في الاستعلامات قول انك محتاج تصريح سفر سياحة للطلبة، هيختملولك بيان القيد. سلم موبايلك في الأمانات، وبعدين هات نموذج تصريح سفر السياحة (بـ270 جنيه تقريبًا) واملأ البيانات. لو انت مسافر فعليًا عن طريق فيينا أو بودابست، اكتب الوجهة دي في التصريح (وقول للعسكري انك مسافر سياحة مش دراسة، ودي حاجة مهمة جدًا). سلم الورق، وابصم، وهيديلك ورقة فيها لينك الاستلام. الاستلام بيكون بليل نفس اليوم (حوالي الساعة 6 مساءً) أونلاين بالرقم القومي. بعد آخر تحديث، مدة التصريح 15 يوم بس وصالح لاستخدام واحد فقط.

إيه الأوراق والحاجات اللي لازم أجيبها معايا من مصر؟

احتفظ بأصل كل حاجة وثقتها وترجمتها: جواز السفر، خطاب القبول المبدئي، الشهادات الدراسية (آخر 4 سنين) مترجمة وموثقة، الفيش والتشبيه، كشف الحساب البنكي، الشهادة الصحية، صور شخصية، وطبعًا ملصق الفيزا أو تصريح الإقامة نفسه. كمان يفضل تجيب نسخة من عقد السكن، إثبات التأمين الصحي، وفلوس كاش تكفيك أول كم يوم لحد ما تفتح حساب بنكي هناك. احتفظ بنسخ سكانر من كل حاجة كباك أب، ولا تحط الأوراق دي في الشنطة اللي بتتسجل في الطيران، خليها معاك في شنطة اليد.